Рок-бөлөх салайааччыта Афанасий Потапов «Амака» бөлөх тэриллиитин туһунан

Мин Афанасий Потапов Чаппанда олохтооҕо, мелодист, ырыа ааптардара Дмитрий Корнилович Потапов уолабын. Бөлөхпүт туһунан кэпсиим. 70-80-90-с сыллар кэннилэриттэн, Никииппэр Сэмиэнэптээх күөннээн кэлбиттэрин кэнниттэн, Ньурба улууһугар тыыннаах музыка симэлийэ сыһан толорооччу фонограмманнан ыллаан, электроннай ырыалар күөдьүйэ сылдьыбыт кэмнэрэ кэлэн ааспыттара. Бу дьыллар кэннилэриттэн 2009 cыллаахха аан бастакыннан биһиги тыыннаах дорҕооҥҥо холонон көрбуппут.

Чугастыы сытар улуустарга Сунтаарга, Үөһээ Бүлүүгэ тыыннаах музыка чааһыгар үлэ барара. «Табык» бырайыак республикаҕа сыллата үлэлии турбута. 2009 сыллаахха Ньурбатаа5ы колледжка аҕам үлэлиир сиригэр инструменнар кэлбиттэрэ. Аҕам аах тэрилтэлэрэ Ньурбаҕа Амакинка микрооройуонугар урукку 2-с оскуола дьиэтигэр баар этэ. Онно аҕабынаан тыыннаах музыканнан улэлиир дьоннору көрдөөн булбуппут.  Бастакы 2009 сыллаахха тэриллибит бөлөхпүтүгэр 4 этибит: 2 күтүөт уолаттар Покровскай Булгунньахтаа5ыттан  Филиппов Владислав, Нам уола Семенов Владислав. А5ам репертуардарыттан ыллаан саҕалаабыппыт. Күтүөттэр барар кэмнэрэ кэлэн, бөлөхпүтүгэр атын уолаттар кинилэри солбуйар буолбуттара. Семенов Вася диэн уол солбуйа сылдьыбыта, бэйэтэ Амакинка уола, тыыннаах музыка диэн баран муннукка ытаабыт уол. Билигин да бааллар итинник дьон, онон биһиги соҕотохсуйбатахпыт.

2010 сыл куһунугэр гитараҕа бэйэтэ оонньоон саҕалаабыт Манчаары Ксенофонтов баарын  истэн, Ньурба5а кэлэҥҥин холонон көрбөккүн дуо диэн аҕам ыйыталаспыт этэ. Дьиҥэ Манчаарыны биһиги уруккуттан билэбит этэ: кини тыыннаах музыка, гитара, Виктор Цой, «Кино” диэн баран рок иһигэр букатын киирбит уол диэн. Бэйэтэ ол саҕана Хатыыга олорор этэ. Дьэ, ол курдук кини сөбүлэһэн биһиэхэ киирдэ.

Геннадий Иванов ол саҕана Ньурбаҕа  колледжка учебнай массыынаҕа автошкола5а суоппардыыр этэ. Кини клавишаҕа учугэй, Ньурбатааҕы ДШИ-га Лена Таюрская5а үөрэммит. Онон бөлөххө музыкальнай көрүүлээх-истиилээх уолаттар кэллилэр, оонньоон холонон көрдүлэр уонна барыта табыллан оонньоон бардыбыт. Ити кэмнэргэ аҕам Дмитрий Корнилович ырыаларын ыллаан сылдьыбыппыт. Аҕам бэйэтэ саастаах киһи быһыытынан  эдэрдэр бэйэҕит оонньоон, туораан биэриэм диэн аранжировщик, таһыттан көмөлөһөөччү курдук сырытта.

Бастаан барабаҥҥа бэйэм олорор, Геннадий синтезаторга турар этибит. Манчаары бас-гитараҕа турар, Васябыт гитара5а сылдьар. Миэстэбитин көһөрсөн-көһөрсөн, булсан-булсан баччааҥҥа диэри аны билигин Геннадий Иванов барабаҥҥа, Манчаары Ксенофонтов баска сылдьаллар, мин гитараҕа уонна ырыаҕа көстүм. Семенов Вася 2013 с. дылы ооньуурбутугар сылдьыспыта, ол кэнниттэн тэйсэн хааллыбыт. Тэринэр кэммигэр бары Ньурбаҕа олорор этибит.

Онтон Манчаары Ньурбаҕа хаалла, мин Дьокуускайга көһөн барбытым, Геналаах Вася куоракка көһөн, оонньуурбут тохтоон хаалбыта. Телефонунан кэпсэтэбит, доҕордоһорбутун курдук доҕордоһобут, арай уруккубут курдук тута муста туспэппит, оонньообоппут, музыкабыт эйгэтигэр тэҥҥэ киирбэппит. Онтон 2015 с. мин Маалыкайга көһөн кэлэбин, манна мин күтүөппүн. Истибитим Манчаарым Ньурбаҕа баар эбит,  Гена куоракка. Онтон Васябыт биһигиттэн тэйэн хаалар. Ол да буоллар Васялыын билигин кэпсэтэбит, кини атын хайысханнан барбыта.

Бу маннык хамсааһыннар, уларыйыылар кэннилэриттэн а5ам Дмитрий Потапов чугастаа5ы сытар нэһилиэкпитигэр Сунтаарга күрэх буолаары турар, уолаттар  уруккугутун санааҥ, хомуйсаҥҥыт ооньоон көрбөккүт дуо диэн эттэ. Боруобалаан көрүөххэ сөп диэн буолла. Геннадийга эрийдим кэлэр кыахтааххын дуо диэн. Оо, Гена олох хаайтара сылдьабыт буоллаҕа. сарсын айанныам диэтэ,  бүгүн да киэһэ хоҥнуом диэтэ. Ол курдук айаннаан кэллэ. Өйүүн буолаары турар күрэхпитигэр биһиги муһуннубут, кэпсэттибит, ханнык ырыалары оонньуохпутун сөбүй диэн уруккубутун санаан колледжпытыгар төттөрү тиийдибит уонна онно мустан оонньоон көрдубут. Дьэ, бардыбыт уонна Сунтаарга. Тиийэн оонньоотубут, биһигини олус сөбүлээтилэр. «Тыыннаах дор5оон» конкурс этэ ити күрэхпит, Сунтаар Элгээйитигэр буолбута. Тэрийээччи ыаллар культура эйгэтигэр үлэлииллэр, тыыннаах музыканы сайыннара сатаан конкурс тэрийэллэр эбит. Дорҕоон туруоралларын онно иһиттибит, бэйэбит да ооньуурбутун сэҥээрэ иһиттибит. Уонна истээччилэр эмиэ сөбулээтилэр. Бу кэннэ бөлөхпүтүнэн Илин Эҥээр диэки айаннаатыбыт: Чурапчыга, Мэҥэ-Хаҥаласка сылдьан конкурстарга кыттан гран-прилары ылбыппыт.

Бу кэннэ Үөһээ-Бүлүү Ороһутуттан төрүттээх Айсен Кысылбаиков Мальдаҕарга үлэлии кэлбитэ. Уруккуттан билсэр буоламмыт гитараҕа оонньуур Айсены биһигини кытта оонньос диэтибит. Холонон көрүөхпүн сеп диэтэ уолбут. Итинтэн саҕалаан Айсен биһиэхэ гитариһынан киирбитэ. 2016 с. мустарбытыгар 3 эрэ буолан сылдьыбыппыт, онтон 2017 с. төрдүөн бу билиҥҥи састааппытынан оонньоон 7 республиканскай конкурска гран-прины олохтообуппут.

Билигин биһигини билэр буоллулар, бэйэ-бэйэбитин эрдэттэн билсэр буоламмыт, олус өйдөһөбүт, тыл тылга киирсэбит, биир тэтими тутабыт. Ньурбаҕа, аты сирдэргэ концертарга ыҥыраллар, онон атын таһымнҥа тахсыбыппыт биллэр буолла.

Ааппыт туһунан кэпсээтэххэ аан бастакы бөлөхпүт сүрэхтэниитэ Бүлүүгэ “Манчаары оонньууларыгар» 2009 с.  “Айылгы”  культура киинигэр буолбута. Концерка ким диэн ааттанабыт диэн ыйытыы турда. “Амака” диэн аат тиийэн кэллэ, Ньурбаҕа Амакинка микрооройуонуттан саҕалаабыт буоламмыт, эбэҥки тылынан “Эһэ” диэн буоларын санаатыбыт уонна бэйэбитин «Ньурба эһэлэрэ” диэн  толкуйдаан бөлөхпүтүн “Амака» диэн ааттаабыппыт.

Е.Толстоухова, Н.Андросова.